বৰপেটাত কুষ্ঠ দিৱস উপলক্ষে সজাগতা সভা , এয়া পাপৰ ফল নহয়ঃউপায়ুক্ত মুনীন্দ্ৰ শৰ্মা

52

বৰপেটাত কুষ্ঠ দিৱস উপলক্ষে সজাগতা সভা , এয়া পাপৰ ফল নহয়ঃউপায়ুক্ত মুনীন্দ্ৰ শৰ্মা
দুৰ্নীতিৰ দৰ্পণ সেৱা ,প্ৰতিবেদক , হাউলী ,বৰপেটা,৩০ জানুৱাৰীঃ ৰাষ্ট্ৰীয় কুষ্ঠ নিবাৰণী দিৱস আজি বৰপেটা জিলাতো দিনজোৰা কাৰ্যসূচীৰে উদযাপন কৰা হয়। বৰপেটা জিলাৰ যুটীয়া স্বাস্থ্য সঞ্চালকৰ কাৰ্যালয় চৌহদৰ পৰা এই উপলক্ষে পুৱা উলিওৱা এটি শোভাযাত্ৰা জিলা উপায়ুক্ত মুনীন্দ্ৰ শৰ্মাই আনুষ্ঠানিকভাৱে পতাকা জোকাৰি মুকলি কৰে । এই উপলক্ষে দিয়া ভাষণত উপায়ুক্ত গৰাকীয়ে কয় যে , এই ৰোগ কোনো পাপৰ ফল নহয় । বৰ্তমানৰ সময়ৰ বাবে ই সাধাৰণ বেমাৰত পৰিণত হৈছে আৰু ইয়াৰ চিকিৎসা অতি সুলভ বুলি তেওঁ মন্তব্য কৰে । তেওঁ স্বাস্থ্য কৰ্মী সকলক ৰোগ বিধৰ বিষয়ে জন সজাগতা সৃষ্টিত ব্ৰতী হবলৈ আহ্বান জনায় । অনুষ্ঠানত যুটীয়া স্বাস্থ্য সঞ্চালক ডাঃ তীৰ্থনাথ শৰ্মা , জিলা তথ্য আৰু জনসংযোগ বিষয়া বিকাশ শৰ্মা, অতিৰিক্ত মুখ্য স্বাস্থ্য বিষয়া ডাঃ প্ৰমথেশ শৰ্মা আদিও উপস্থিত থাকে । শোভাযাত্ৰাত অংশগ্ৰহণ কৰা শতাধিক স্বাস্থ্য কৰ্মীয়ে হাতে হাতে “কুষ্ঠ ৰোগ জন্ম বা বংশগত নহয়”, “সুচিকিৎসাৰে কুষ্ঠ ৰোগৰ পৰা সহজে আৰোগ্য হব পাৰে” আদি বেনাৰ , প্লেকাৰ্ড লৈ শ্লোগান দি চহৰৰ মাজেৰে পৰিভ্ৰমণ কৰে । পিছত জিলা পুথিভঁৰাল প্ৰেক্ষাগৃহত এই উপলক্ষে এখন ৰাজহুৱা সজাগতা মূলক সভাও অনুষ্ঠিত হয় । সভাত যুটীয়া স্বাস্থ্য সঞ্চালক ডাঃ শৰ্মাই কয় যে , কুষ্ঠ ৰোগৰ উপযুক্ত সময়ত চিকিৎসা কৰিলে সহজে আৰোগ্য লাভ কৰিব পাৰি । তাৰ বাবে এই ৰোগৰ যিকোনো লক্ষণে দেখা দিলে লগে চিকিৎসালয়ত স্বাস্থ্য পৰীক্ষাৰ ব্যৱস্থা কৰিব লাগে । এনে ৰোগত আক্ৰান্ত ৰোগী সকলক বিনামূলীয়া ঔষধ-পাতিৰ উপৰি মাহে পাচঁশ টকাৰ অৰ্থ সাহায্য‌ও প্ৰদান কৰা হয় বুলি তেওঁ জানিবলৈ দিয়ে ।

Total Page Visits: 11 - Today Page Visits: 1