ৰঙিয়াত মাছৰ পোনা পৌনিক কেন্দ্ৰৰ শুভ উদ্বোধন মীন মন্ত্ৰী পৰিমল শুক্লবদ্যৰ

89

ৰঙিয়াত মাছৰ পোনা পৌনিক কেন্দ্ৰৰ শুভ উদ্বোধন মীন মন্ত্ৰী পৰিমল শুক্লবদ্যৰ
ষ্টাফ ৰিপʼৰ্টাৰ , চৈয়দ মোস্তাফা আহমেদৰ প্ৰতিবেদন , ৰঙিয়াঃ ৰঙিয়াৰ মহকুমা মীন উন্নয়ন বিষয়াৰ কাৰ্যলয়ত আজি ৰাজ্যৰ প্ৰথমটো মৎস্য পোনা পৌনিক উৎপাদনকেন্দ্ৰৰ শুভ উদ্বোধন কৰা হয় । ৰঙিয়াত প্ৰথমবাৰলৈ কেন্দ্ৰটোৰ শুভ উদ্বোধন কৰে অসম চৰকাৰৰ মীন বিভাগৰ মন্ত্ৰী পৰিমল শুক্লবদ্যই । এই উপলক্ষে এখন সভা অনুষ্ঠিত হয় । মীন বিষয়া ধ্ৰুৱজ্যোতি শৰ্মাই সঞ্চালনা কৰা সভাখনত মীন মন্ত্ৰী পৰিমল শুক্লবদ্য , জলসিঞ্চন মন্ত্ৰী তথা স্থানীয় বিধায়ক ভৱেশ কলিতা , মীন বিভাগৰ সঞ্চালক মৃণাল ক্ৰান্তি দেৱ নাৰায়ণ সহ কেইবা গৰাকী বিষয়া উপস্থিত থাকে । মীন মন্ত্ৰী পৰিমল শুক্লবদ্যই তেওঁৰ ভাষণত কয় যে , বৰ্তমান সময়ত ৰাজ্যৰ মীন বিভাগটোৱে ৩.৭৬ লাখ মেট্ৰিক টন মাছ উৎপাদন কৰিবলৈ সক্ষম হৈছে । ইয়াৰ উপৰিও ৰাজ্যত উৎপাদিত মাছ চুবুৰীয়া ৰাজ্য মেঘালয় , ত্ৰিপুৰা, নাগালেণ্ডলৈ ৰপ্তানি কৰিবলৈ সক্ষম হৈছে । ১২,৫০০ টা পুখুৰীৰ খনন কাৰ্য্য ইতিমধ্যে সম্পন্ন হৈছে বুলিও মীন মন্ত্ৰী গৰাকীয়ে উল্লেখ কৰে।লগতে কয় যে , বৰ্তমান সময়ত ৰাজ্যত মৎস্য উৎপাদন বৃদ্ধি পোৱাত ৰাজ্যৰ অৰ্থনৈতিক ক্ষেত্ৰ খনলৈ এক আশাৰ বতৰা আহিছে । বিশ্ব বেংকৰ পৰা লাভ কৰা ৭৪ লাখ ৬৪ হাজাৰ ৬০০ টকাৰে ৰঙিয়াৰ এই প্ৰথম মাছৰ পোনা পৌনিক কেন্দ্ৰটো নিৰ্মাণ কৰি উলিওৱা হয় বুলি উল্লেখ কৰে । ইয়াৰ উপৰিও অচিৰেই “ৰেডি টু ইট” শীৰ্ষক আচনীৰে ঘৰে ঘৰে উন্নত মানৰ মাছৰ যোগান ধৰাৰ ব্যৱস্থা গ্ৰহণ কৰা হব বুলি উল্লেখ কৰে মন্ত্ৰী গৰাকীয়ে।