হৰি নামে মুখৰিত দেৰগাঁৱৰ ঐতিহ্যমণ্ডিত ভিক্ষাৰীৰ কৃষ্ণ মন্দিৰ, দিনযোৰা কাৰ্যসূচীৰে শ্ৰী শ্ৰী কৃষ্ণৰ জন্মাষ্টমী পালন

128

হৰি নামে মুখৰিত দেৰগাঁৱৰ ঐতিহ্যমণ্ডিত ভিক্ষাৰীৰ কৃষ্ণ মন্দিৰ, দিনযোৰা কাৰ্যসূচীৰে শ্ৰী শ্ৰী কৃষ্ণৰ জন্মাষ্টমী পালন

দুৰ্নীতিৰ দৰ্পণ সেৱা , দেৰগাঁও,৩০ আগষ্টঃ ক’ৰনা সৃষ্ট পৰিৱেশৰ মাজতেই আজি হিন্দুধৰ্মাৱলম্বী লোক সকলে ভগৱান শ্ৰী শ্ৰী কৃষ্ণৰ জন্মাষ্টমী পালন কৰিছে । অন্যান্য অঞ্চলৰ লগতে দেৰগাঁৱৰ ব্ৰহ্মপুত্ৰ অঞ্চলৰ ডুবিগাঁওস্থিত ঐতিহ্যমণ্ডিত ভিক্ষাৰীৰ কৃষ্ণ মন্দিৰৰ প্ৰাংগনতো দিনযোৰা কাৰ্যসূচীৰে শ্ৰী শ্ৰী কৃষ্ণৰ জন্মাষ্টমী পালন কৰা হয় । এই উপলক্ষে পুৱাৰে পৰা মিছিং জনগোষ্ঠীয় অঞ্চলটিত উৎসৱ মুখৰ পৰিবেশে বিৰাজ কৰে । হৰিনামৰ ধ্বনিৰে মুখৰিত হৈ পৰে অঞ্চলটোৰ আকাশ বতাহ । দুৰদুৰনীৰ ভক্তৰ লানি নিচিগা সোঁত বয় ঐতিহ্যমণ্ডিত মন্দিৰ ভাগিলৈ । শৰাই নৈবদ্য আগবঢ়াই সকলোৱে সেৱা জনাই আশীষ বিচাৰে অদৃশ্য জনৰ ওচৰত । উল্লেখ্য যে,মিচিং জনগোষ্ঠীৰ লোকসকলৰ মাজত অৱস্থিত এই মন্দিৰ ভাগিত প্ৰতি বছৰে কৃষ্ণৰ জন্মাষ্টমী,মহাপুৰুষ মাধৱদেৱ আৰু শংকৰদেৱৰ তিথি,শংকৰ জন্মোৎসৱ পালন কৰি আহিছে । এই লোকসকলে শংকৰদেৱৰ আদৰ্শক আগবঢ়াই নিছে । জ্যেষ্ঠ সকলৰ উপৰিও কণ কণ সকলেও নাগাৰা নাম পৰিৱেশন,খোলবাদ্য প্ৰদৰ্শন কৰাৰ লগতে ঘোষা, কীৰ্ত্তনৰ জ্ঞান আহৰণ কৰি অঞ্চলটিৰ শংকৰী কৃষ্টিক জীয়াই ৰাখিবলৈ প্ৰচেষ্টা অব্যাহত ৰাখিছে । ভিক্ষাৰীৰ কৃষ্ণ মন্দিৰ পৰিচালনা সমিতিৰ সভাপতি উমেশ্বৰ পাও আৰু অনিল আহোমে আজিৰ কাৰ্যসূচী সাফল্য মণ্ডিত কৰি তোলাৰ বাবে সদৌটি ভক্তপ্ৰাণ ৰাইজৰ প্ৰতি কৃতজ্ঞতা জ্ঞাপন কৰিছে ।