নগাঁৱত আমছুৰ “ঘৰে ঘৰ শিক্ষা,তেতিয়াহে ৰক্ষা” শীৰ্ষক মাণ্ডলিক সভাত ৰেজাউল কৰিম চৰকাৰ

96

নগাঁৱত আমছুৰ “ঘৰে ঘৰ শিক্ষা,তেতিয়াহে ৰক্ষা” শীৰ্ষক মাণ্ডলিক সভাত ৰেজাউল কৰিম চৰকাৰ

“সংখ্যালঘু সকলক বাদ দি এখন বৃহত্তৰ অসমীয়া সমাজ গঠন কৰিব নোৱাৰি” , শিক্ষা-সমাজ সেৱাৰ লগত জৰিত সাত গৰাকী মহিলাক সম্বৰ্ধনা

দুৰ্নীতিৰ দৰ্পণ সেৱা ,ৱাহিদুদ জামান , নগাঁও , ১৮ ছেপ্টেম্বৰ : সদৌ অসম সংখ্যালঘু ছাত্ৰ ইউনিয়ন চমুকৈ আমছুৱে গ্ৰহণ কৰা “ঘৰে ঘৰে শিক্ষা,তেতিয়াহে ৰক্ষা” শীৰ্ষক কাৰ্যসূচীৰ অংশ হিচাপে আজি নগাঁও চহৰৰ এলফিনিষ্টন সভা গৃহত এখন মাণ্ডলিক সভা অনুষ্ঠিত হয় । আমছুৰ নগাঁও জিলা সমিতিৰ উদ্যোগত আৰু মৰিগাঁও, হোজাই, কলিয়াবৰ আৰু কাৰ্বি আংলং জিলাৰ সহযোগত অনুষ্ঠিত এই মাণ্ডলিক সভাত সংখ্যালঘু ছাত্র সংগঠনটোৰ কেন্দ্ৰীয় সভাপতি ৰেজাউল কৰিম সৰকাৰে অংশগ্ৰহণ কৰি কয় , “ৰাজ্যৰ এটা অন্যতম সৰ্ব বৃহৎ জনগোষ্ঠী হৈছে ধৰ্মীয় সংখ্যালঘু সকল । এই লোক সকলক বাদ দি এখন বৃহত্তৰ অসমীয়া সমাজ চিন্তা কৰিব নোৱাৰি ।” তেওঁ লগতে কয়,’সংখ্যালঘু সকল সৰ্ব দিশত পিছপৰা । বিশেষকৈ ৰাজনৈতিক , অৰ্থনৈতিক,সামাজিক,সাংস্কৃতিক আদি সকলো দিশতে পিছপৰি থকাৰ মুল কাৰণটোৱেই হৈছে শিক্ষা । এই জনগোষ্ঠীটো শিক্ষাৰ দিশত পিছপৰি থকাৰ বাবে স্বাধীনতাৰ পিছৰে পৰা যিমান চৰকাৰ গঠন হৈছে প্ৰায় সকলোৱে জনগোষ্ঠীটোক প্ৰতাৰণা কৰি আহিছে । বিভিন্ন সময়ত এই জনগোষ্ঠীৰ লোক সকল লাঞ্চনা আৰু বঞ্চনাৰ বলি হৈ আহিছে । সেয়ে এই জনগোষ্ঠীটো যাতে ৰাজ্যৰ আন আন জাতি-জনগোষ্ঠীৰ লগত ফেৰ মাৰিব পাৰে , তাৰ বাবে সংখ্যালঘু সকলক শিক্ষাৰ দিশত আগুৱাই লৈ যাবলৈ আমছু উদ্যোগত “ঘৰে ঘৰে শিক্ষা,তেতিয়াহে ৰক্ষা” নামৰ এক কাৰ্যসূচী গ্ৰহণ কৰা হৈছে । সভাত ৰূপহীহাটৰ বিধায়ক নুৰুল হুদাই কয়,”সকলো সমস্যাৰ মুলতে হ’ল শিক্ষা । যেতিয়াই মানুহ সু-শিক্ষাৰে শিক্ষিত হ’ব , তেতিয়াই সকলো সমস্যাই আপুনি আপুনি সমাধান হ’ব । সংখ্যালঘু সকল একমাত্ৰ শিক্ষাৰ অভাৱৰ বাবেই বহু পিছপৰি আছে । বিধায়ক গৰাকীয়ে শিক্ষাৰ ক্ষেত্ৰত চৰকাৰে গ্ৰহণ কৰা কেতবোৰ নীতিক সমালোচনা কৰি কয়,সৰ্বশিক্ষাৰ নিয়ম অনুসৰি শিক্ষানুষ্ঠান সমুহত ৩০:১ অনুপাত অনুসৰি শিক্ষক থাকিব লাগে । কিন্তু ৰাজ্যৰ অধিকাংশ বিদ্যালয়তে এই অনুপাত নাই । সভাত আমছুৰ মুখ্য উপদেষ্টা তথা অধিবক্তা আইনুদ্দিন আহমেদে সংখ্যালঘু সমাজৰ পৰা বাল্য বিবাহ ৰোধ কৰাৰ ওপৰত গুৰুত্ব প্ৰদান কৰি ভাষণ আগবঢ়ায় । উক্ত সভাতেই শিক্ষা আৰু সমাজ সেৱাৰ লগত জড়িত থকা সাত গৰাকী বিশিষ্ট মহিলাক সম্বৰ্ধনা জনোৱা হয় । তেওঁলোক হ’ল নগাঁও ছোৱালী মহাবিদ্যালয়ৰ সহযোগী অধ্যাপক ড: অমিয়া পাটৰ , হোজাই ৰবীন্দ্ৰনাথ ঠাকুৰ ইউভাৰচিটিৰ সহকাৰী অধ্যাপিকা জয়িতা দাস,কলিয়াবৰ মহাবিদ্যালয়ৰ অধ্যাপিকা গিতাঞ্জলী পাংগিং গাম , মৰিগাঁও আদালতৰ চৰকাৰী অধিবক্তা তথা সমাজ সেৱিকা অলকানন্দা কাকতি,শিক্ষয়িত্ৰী জুলি কান্দুলনা , নগাঁৱৰ বিশিষ্ট সমাজ সেৱিকা আনোৱাৰা খাতুন,হোজাইৰ বিশিষ্ট অধিবক্তা ৰুহিনা ওৱাৰিছ চৌধুৰী । আমছুৰ কেন্দ্ৰীয় উপ সভাপতি মোশ্বাৰফ হুছেইন কবিৰে সঞ্চালনা কৰা সভাত আমছুৰ সাধাৰণ সম্পাদক মিনন্নাতুল ইছলাম,উপ সভাপতি সাকিল আহমেদকে ধৰি বহু কেইগৰাকী কেন্দ্ৰীয় নেতৃত্ব উপস্থিত থাকে ।