আকৌ এবাৰ দেশত এদিনতে ১ কোটি লোকক ভেকচিন প্রদানেৰে অভিলেখ

74

আকৌ এবাৰ দেশত এদিনতে ১ কোটি লোকক ভেকচিন প্রদানেৰে অভিলেখ

ষ্টাফ ৰিপৰ্টাৰ, দুৰ্নীতিৰ দৰ্পণ, ২৯ আগষ্টঃ দেশত ক’ভিড–১৯ টিকাকৰণ অভিযান ক্ষিপ্রতৰ কৰি তুলিছে ৷ বিশ্বৰ বৃহত্তম ক’ভিড–১৯ টিকাকৰণ অভিযানৰ এদিনত ভেকচিনৰ ড’জ প্রদানত পুনৰ আন এক অভিলেখ গঢ়িলে ৷ ইতিপূর্বে এদিনত ৮০ লাখ ভেকচিন ড’জ প্রদান কৰি অভিলেখ গঢ়াৰ পাছত দুদিন পূর্বে এদিনত ৯০ লাখ ভেকচিনৰ ড’জ প্রদান কৰি আন এক অভিলেখ গঢ়ে ৷ যোৱা ২৪ ঘণ্টাত এই অভিলেখ ভংগ কৰি পুনৰ আন এক বিশ্ব অভিলেখ গঢ়ে ভাৰতে ৷ এদিনত ১ কোটিতকৈ অধিক ভেকচিন প্রদান কৰি বিশ্ব অভিলেখ গঢ়া বুলি কেন্দ্রীয় স্বাস্থ্যমন্ত্রী মনসুখ মাণ্ডাভিয়াই টুইটযোগে ঘোষণা কৰি দেশবাসীক অভিনন্দন জ্ঞাপন কৰে ৷ দেশে ভেকচিন প্রদানক লৈ অভিলেখ গঢ়াৰ পাছত প্রধানমন্ত্রী নৰেন্দ্র মোদীয়ে টুইটযোগে কয় যে , আজি অভিলেখ সংখ্যক টিকাকৰণ কৰা হৈছে ৷ এক কোটিতকৈ অধিক ভেকচিন প্রদান কৰাটো মহত্ত্বপূর্ণ কৃতিত্ব ৷ যিসকলে ভেকচিন ল’লে,তেওঁলোকক ধন্যবাদ আৰু যিসকলে টিকাকৰণ অভিযান সফল কৰি তুলিছে,তেওঁলোককো ধন্যবাদ জনায় । উল্লেখ্য যে , যোৱা ২৪ ঘণ্টাত দেশত ৪৬,৭৫৯ জন আক্রান্ত হোৱাৰ বিপৰীতে ৫০৯ জনৰ প্রাণহানি হৈছে ৷ কেন্দ্রীয় স্বাস্থ্য মন্ত্রালয়ৰ তথ্য অনুসৰি , যোৱা ৩১ দিন ধৰি দেশত পজিটিভিটীৰ হাৰ ৩ শতাংশৰ তলত আছে ৷ অৱশ্যে বিগত চাৰি দিন ধৰি দেশত আক্রান্তৰ সংখ্যা সামান্য পৰিমাণে বৃদ্ধি পাই আছে ৷ সর্বাধিক আক্রান্তৰ তালিকাত আছে কেৰালা ৷ দেশৰ মুঠ আক্রান্তৰ প্রায় ৬০ শতাংশই কেৰালাৰ ৷ বর্তমান দেশত সক্রিয় ক’ভিড ৰোগীৰ সংখ্যা ৩,৫৯,৭৭৫ ৷ সুস্থতাৰ হাৰ ৯৭.৫৬ ৷ আনপিনে সমাগত উৎসৱৰ বতৰ উপলক্ষে ক’ভিড–১৯ ৰ সংক্রমণ যাতে বৃদ্ধি নহয়,তাৰ প্রতি লক্ষ্য ৰাখি কেন্দ্রীয় চৰকাৰে ক’ভিড–১৯ নির্দেশনা অহা ৩০ ছেপ্ঢেম্বৰলৈকে সম্প্রসাৰণ কৰিছে ৷ উৎসৱৰ সময়ত যাতে জনতাৰ ভিৰ নিয়ন্ত্রণ কৰিব পাৰে,সেই সন্দর্ভত প্রয়োজনীয় ব্যৱস্থা ৰাজ্য আৰু কেন্দ্রীয়শাসিত অঞ্চলসমূহক গ্রহণ কৰিবলৈ পৰামর্শ আগবঢ়াইছে কেন্দ্রীয় চৰকাৰে ৷ মন কৰিবলগীয়া যে , কেৰালাত ঈদ আৰু অ’নাম উদ্যাপনৰ পাছতেই সংক্রমণৰ হাৰ দ্রুতগতিত বৃদ্ধি পোৱাৰ পৰিপ্রেক্ষিতত কেন্দ্রীয় চৰকাৰে আন আন ৰাজ্যসমূহকো সজাগ হ’বলৈ নির্দেশ দিছে ৷